अहिल्यानगर (प्रतिनिधी)

आपुलकीची दिवाळी म्हणजे केवळ प्रकाशाचा नाही, तर मनांमधील स्नेहाचा सण — हे दाखवून दिलं युवा एकसाथ फाउंडेशनने. विळदघाट येथील मातोश्री वृद्धाश्रमात संस्थेच्या कार्यकर्त्यांनी ज्येष्ठ नागरिकांसोबत आपुलकीची दिवाळी साजरी केली. वृद्धांच्या चेहऱ्यावर हास्य आणि डोळ्यांत आनंदाश्रू झळकले. संपूर्ण वातावरण आपुलकीच्या प्रकाशाने उजळले.

आपुलकीची दिवाळी या उपक्रमादरम्यान वृद्धाश्रमातील आजी-आजोबांना मिठाई, फळे, कपडे आणि दैनंदिन वापराच्या वस्तू भेट देण्यात आल्या. फाउंडेशनचे अध्यक्ष रोहित काळोखे यांच्या नेतृत्वाखाली सचिव सुमित भिंगारदिवे, कार्याध्यक्ष प्रिती क्षेत्रे, उपाध्यक्ष संदेश कानडे, तसेच राज जाधव, महेश साठे, प्रितेश मोहिते, टेरी वाघमारे, हर्ष शिरसाठ, श्रावणी घोडके, ऋग्वेद घोडके, शार्दुल लोखंडे, वैभव गारुडकर, प्रशांत कनगरे, वैभव गुढेकर उपस्थित होते.

या वेळी तरुणांनी वृद्धांसोबत गप्पा मारल्या, गाणी गायली, खेळ खेळले आणि सणाचा खरा आनंद वाटला. या आपुलकीच्या दिवाळी उपक्रमामुळे वृद्धाश्रमात नवचैतन्य निर्माण झालं.

फाउंडेशनचे अध्यक्ष रोहित काळोखे म्हणाले, “आपुलकीची दिवाळी म्हणजे मनांमधील जवळीक आणि प्रेमाची दिवाळी. समाजात अनेक ज्येष्ठ नागरिक आपल्या कुटुंबापासून दूर आहेत. त्यांच्या चेहऱ्यावर हास्य फुलवण्यासाठी हा आमचा छोटासा प्रयत्न आहे. प्रत्येक तरुणाने अशा सामाजिक कार्यात सहभागी व्हावं, कारण वृद्धांचे आशीर्वाद हीच खरी संपत्ती आहे.”

ते पुढे म्हणाले, “आजच्या पिढीने सोशल मीडियावर साजरे होणारे सण थोडे बाजूला ठेवून, कोणाच्या जीवनात प्रकाश नेण्याचं काम करावं — हाच ‘आपुलकीची दिवाळी’ या उपक्रमाचा खरा अर्थ आहे.”

अधिक माहितीसाठी: https://maharashtra.gov.inआणखी दिवाळी बातम्या वाचा: दिवाळी उत्सव 2025