नगर | प्रतिनिधी
अहिल्यानगर शहरात शनिवारी (दि. ६) सायंकाळी ४ वाजल्यापासून गणेश विसर्जन मिरवणुकीला सुरुवात होणार असून यासाठी शहर पोलीस प्रशासनाने विशेष तयारी केली आहे. मिरवणुकीदरम्यान गर्दीचे नियंत्रण ठेवण्यासाठी आणि वाहतूक कोंडी टाळण्यासाठी प्रमुख मार्गांवर “नो व्हेईकल झोन” घोषित करण्यात आला आहे. गणेश विसर्जनाच्या पार्श्वभूमीवर शहरातील प्रमुख मिरवणूक मार्गावरील वाहने पूर्णतः बंद राहणार असून नागरिकांनी याची नोंद घ्यावी, असे आवाहन पोलीस प्रशासनाने केले आहे. मुख्य मिरवणूक मार्ग पुढीलप्रमाणे : माळीवाडा विशाल गणपती – अमन पाटील रोड – कौठीची तालीम – जुनी वसंत टॉकीज – बंगाल चौकी – धरती चौक – हातमपूरा चौक – नालबंद खूट – रामचंद्र खूट – आयडते बाजार – दाळ मंडई – तेलीखूट – कपड बाजार – भिंगार वाला चौक – अर्बन बँक रोड – नवपेठ – नेता सुभाष चौक – मुंजोबा चौक – चितळे रोड – चौपाटी कारंजा – दिल्लीगेट – नालेगाव – बाळाजी बुवा विहीर. मिरवणुकीदरम्यान शहरातील या सर्व मार्गांवर वाहतूक बंद राहणार असल्याने नागरिकांनी पर्यायी मार्गांचा वापर करावा. पोलीस प्रशासनाकडून सुरक्षा व्यवस्था कडक करण्यात आली असून मिरवणूक सुरळीत पार पाडण्यासाठी विशेष पथके तैनात करण्यात आली आहेत.
