पुण्यातील शेठ हिराचंद नेमचंद जैन बोर्डिंगच्या जमिनीवरील वादग्रस्त व्यवहारावर अखेर मोठा निर्णय घेण्यात आला आहे. समाजाच्या तीव्र विरोधानंतर गोखले बिल्डर्स यांनी रविवारच्या रात्री उशिरा ईमेलद्वारे जैन बोर्डिंग व्यवहार रद्द करण्याची घोषणा केली. या नाट्यमय घडामोडीनंतर संपूर्ण जैन समाजात आनंदाचे वातावरण पसरले असून पुणेभर ठिकठिकाणी फटाके फोडून जल्लोष साजरा करण्यात आला.
गेल्या काही दिवसांपासून या व्यवहारावरून जैन समाजात तीव्र नाराजी होती. ट्रस्टच्या जमिनीचा खरेदी-विक्री व्यवहार झाल्याचा आरोप होत होता. “धर्म खरेदी-विक्रीची वस्तू नाही” असा नारा देत समाजाने आंदोलन उभारले होते. अखेर सततचा दबाव, राजकीय चर्चासत्रे आणि धार्मिक भावना यामुळे जैन बोर्डिंग व्यवहार रद्द करण्याचा निर्णय घेण्यात आला.
या प्रकरणात खासदार मुरलीधर मोहोळ यांनी मध्यस्थी करत समाजाला विश्वास दिला होता की “समाजाला जे हवे तेच होईल.” त्यानंतर रविंद्र धंगेकर आणि समाज नेत्यांनी स्पष्ट केले की व्यवहार रद्द होईपर्यंत आंदोलन सुरूच राहील. शेवटी रात्री गोखले बिल्डर्सच्या अधिकृत मेलने सर्वांना दिलासा मिळाला.
ईमेलमध्ये बिल्डर्सकडून नमूद करण्यात आले आहे की, “जैन समाजाच्या भावनांचा आदर राखत आम्ही हा व्यवहार रद्द करीत आहोत.” त्यानंतर ट्रस्ट परिसरात आणि जैन मंदिरात समाजबांधवांनी एकत्र येत “जय जिनेंद्र” च्या घोषणांसह जल्लोष केला.
या निर्णयामुळे पुण्यातील जैन समाजाला दिलासा मिळाला असून धार्मिक स्थळाच्या जपणुकीसाठी लढलेल्या आंदोलनकर्त्यांना नैतिक विजय मिळाला आहे. आता पुढील काही दिवसांत ट्रस्ट प्रशासनाकडून व्यवहाराशी संबंधित सर्व कागदपत्रे सार्वजनिक होण्याची अपेक्षा व्यक्त केली जात आहे.
