अहिल्यानगर | १२ एप्रिल
अहिल्यानगरमध्ये सुरू असलेल्या फ्रेंड्स कॉर्पोरेट क्रिकेट लीगमध्ये रविवारी दोन अत्यंत चुरशीचे सामने पार पडले. खेळाडूंच्या दमदार कामगिरीमुळे प्रेक्षकांना रोमांचक क्रिकेटचा आनंद अनुभवता आला.
पहिल्या सामन्यात नगर डिस्ट्रिक्ट सीनियर्स संघाने क्रिकेट स्टार करंजी संघावर १९ धावांनी मात करत विजयी सलामी दिली. प्रथम फलंदाजी करताना सीनियर्स संघाने निर्धारित षटकांत ८ गड्यांच्या मोबदल्यात १६२ धावा उभारल्या. या आव्हानात्मक धावसंख्येचा पाठलाग करताना करंजी संघाने चांगली झुंज दिली; मात्र ५ गडी गमावत त्यांना १४३ धावांपर्यंतच मजल मारता आली. सीनियर्स संघाच्या विजयात नासिर कोतवाल यांची उत्कृष्ट कामगिरी ठरली असून त्यांना सामनावीर पुरस्काराने गौरविण्यात आले.
दुसऱ्या सामन्यात ए. बी. ऍक्ट अहिल्यानगर संघ व नगर चॅम्पियन्स यांच्यात रंगतदार लढत झाली. ए. बी. ऍक्ट संघाने प्रथम फलंदाजी करताना ८ गड्यांच्या मोबदल्यात १५७ धावा केल्या. प्रत्युत्तरात नगर चॅम्पियन्स संघाने आक्रमक फलंदाजी करत १७.२ षटकांतच १६० धावा पूर्ण करून शानदार विजय मिळवला. या सामन्यात वैभव वाघ यांनी सर्वांगीण खेळ करत संघाच्या विजयात मोलाचा वाटा उचलला आणि त्यांना सामनावीर म्हणून निवडण्यात आले.
दोन्ही सामन्यांमध्ये खेळाडूंनी दाखवलेल्या कौशल्यामुळे स्पर्धेची रंगत अधिकच वाढली असून पुढील सामनेही तितकेच उत्कंठावर्धक होणार असल्याचे संकेत मिळत आहेत.
नविन बातम्यांसाठी 👉 http://Ahilyanagar24live.com
